निर्मला ठकुराठी

काठमाडाैं, असार ३० । नुवाकोट घर भई काठमाडौंको धापासीमा डेरा गरी बस्ने लतासा क्षेत्रीको हत्या भएको भन्दै किटानी जाहेरी दर्ता गर्न खोज्दा महाराजगन्ज प्रहरीले  दर्ता गर्न नमानेको मृतकको माइती पक्षले आरोप लगाएको छ  ।

नेपाली सेनाका मेजर बिष्णु कार्कीकी श्रीमती २२ वर्षीया लतासा क्षेत्रीको २५ गते दिउँसो ३ बजे धापासीस्थित ग्राण्डी अस्पतालमा रहस्यमय मुत्यु भएको भन्दै मेजर बिष्णु कार्की विरुद्ध किटानी जाहेरी दिन खोज्दा प्रहरीले नमानेको मृतककी आमा शारदा थापा क्षेत्रीले बताइन् ।

प्रहरीले जाहेरी दर्ता गरेपनी किटानी जाहेरी दर्ता गर्न आनाकानी गरिरहेको पीडित पक्षले बताएको छ । मृत्यु भएको ६ दिन बितिसक्दा पनि आफूले छोरीको लास पनि हेर्न नपाएको शारदा बताइन् । प्रहरीले किटानी जाहेरी दर्ता गर्न नमाने छोरीको आत्महत्या वा हत्या पुष्टी गर्नुपर्ने शारदाको भनाइ छ  ।

आफूले छोरीको न सास न लास देख्न पाएको दुखेसो गर्दै उनले चित्त बुझ्दो जवाफ नआए सम्म चुप लागेर नबस्ने  चेतावनी दिइन ।

घट्नाका बारेमा महानगरीय प्रहरी बृत्त महाराजगञ्जका प्रहरी नायब उपरिक्षक सानुराम भट्टराईले  पीडित पक्ष किटानी जाहेरी दर्ता गर्न नआएको दाबी गरे । उनले भने  घट्ना हत्या या आत्महत्या के हो सुक्ष्म ढङ्गले छानबिन भैरहेको  जानकारी दिए ।

 पीडित पक्षले जाहेरीमा छानविन गरिपाउ भनेर उजुरी गरेकाले त्यसै अनुसार काम  भैरहेको र कुनै कसर बाँकी नराखी छानबिन गर्नेपनि उनले बताए । ‘सरकारबादी मुद्दा भएकाले यसमा अहिले  नै केहि बोल्नु भन्दापनि सत्य कुरा पत्ता लागेपछि आफै थाहा हुन्छ । घटनाको छानवीन गर्न पीडित पक्षसँग पनि सहकार्य भैरहेको छ’— उनले भने ।

प्रहरी अपराध अनुसन्धान महाशाखाले घट्नाका बारेमा प्रक्रियागत रुपमा छनबिन भैरहेको जनाएको छ ।  दोषी यहि नै हो भन्ने किटान नहुन्जेल कसैलाई पनि समात्न नसकिने महाशाखाको भनाई छ ।

गएको मंसिर २० गते विष्णु कार्कीसँग लतासाको विवाह भएको थियो । विवाह भएको दुई हप्तादेखि नै उनलाई श्रीमानले यातना दिने गरेको माइती पक्षको भनाई छ ।

प्रकाशित मितिः २०७२ असार ३० गते बुधवार