महिलाको आत्मसम्मान र अधिकारलाई समेट्न सकेन :अधिकारकर्मी


प्रकाशित मिति :2015-09-21 13:44:41

महिला खबर 

पोखरा,असोज ४ । लामो समयको अन्तरालपछि ‘नेपालको संविधान २०७२’ नेपाली जनताले आइतवार प्राप्त गरेका छन् । यो देशले प्राप्त गरेको महत्वपूर्ण उपलब्धि हो । यसले देशमा खुसियालिसँगै केही निराशा पनि ल्याएको छ । यसै प्रसंगमा केन्द्रित रहेर पोखराका विभिन्न क्षेत्रमा क्रियाशिल महिलाले महिला खबरडटकमसँग ‘नेपालको संविधान २०७२’ बारे व्यक्त गरेका धारणा ।

sarala pande

सरला कुमारी पाण्डे
शान्तिका लागि नागरिक समाज संजाल : अध्यक्ष
यतिबेला देशले महत्वपूर्ण उपलब्धि हासिल गरेको छ । नेपाली जनताका प्रतिनिधिले संविधानसभा मार्फत् संविधान जारी गर्नका लागि विगत सात दशक देखि नेपाली जनताले गर्दै आएको आन्दोलन यतिबेला सार्थक सावित भयो ।
यसर्थमा नेपालको संविधान २०७२ लाई स्वागत गर्नैपर्छ । समग्रमा संविधान राम्रो छ । यद्यपी जारी संविधानले महिला अधिकारकर्मीहरूले उठाएका मागहरूको पूर्ण रुपमा संबोधन हुन सकेन यसले अधिकारकर्मीहरूलाई स्तब्ध बनाएको छ । तर, पनि नेपाली महिलाले जारी संविधानको हार्दिक स्वागत पनि गरेका छन् ।
महिला आन्दोलन र योगदान मात्र होइन, विश्वको अभ्यासलाई हे-याे   भने पनि पूर्ण संविधान कही कतै हुँदैन । तर, ५१ प्रतिशत महिलाका मुद्दालाई संबोधन नहुँनु महिलाको मात्र होइन, आम नेपालीको चित्त दुखाई हुनु पर्ने हो । यस प्रति सम्पूर्ण राजनैतिक दलको ध्यान जान जरुरी छ ।

संविधानमा भएका प्रावधानहरू जारी भएपछि त्यो संसोधन नहुँने भन्ने हुँदैन । समय परिस्थीति र जनताका माग अनुसार संबोधन हुँदै जानु पर्दछ । महिलाका मुद्दाहरूलाई संसोधन गरी ५१ प्रतिशत जनसंख्या ओगटेका महिलाको माग प्रति सम्पूर्ण राजनैतिक दलहरू संवेदनशिल भई हाम्र्रा मागहरूको सुनुवाई हुनु पर्दछ । साथै असन्तुष्ट राजनैतिक दलका जायज मागहरूलाई पनि संबोधन गरी लैजानु पर्दछ । यसो गरेमा मात्र सम्पूर्ण जनताको मागलाई संबोधन गरेको आभाष हुनेछ ।

kopila ranabhat

कोपिला रानाभाट
नेपाल महिला संघ कास्की :अध्यक्ष
नेपाली जनताको संविधानसभाबाट संविधान जारी होस् भन्ने ठूलो चाहाना यतिबेला पुरा भएको छ । हामी नेपालीको लागि खुशी गौरवको कुरा हो । संविधानमा हरेक जातजाति भाषाभाषि र धर्मका कतिपय मागहरू समेटिन नसकिएका होलान् । यद्यपि बहुमत जनताको इच्छालाई यसले समावेश गरेको छ । यो खुशीलाई दीगो बनाउनु सबैको कर्तव्य पनि हो ।

देशको परिवर्तनलाई नेपाली महिलाले गरेको त्याग र बलिदान सदास्मरणीय छ । विभिन्न जिम्मेवारी भूमिकामा रहेर विभिन्न चरणका आन्दोलनमा होमिएका महिला यतिबेला जारी संविधानबाट पूर्ण सन्तुष्ट छैनन् । आमाको नामबाट नागरिकतामा केही सहज व्यवस्था भएपनि आमाको पूर्ण अस्तित्व र अधिकारलाई यो संविधानले समेटेन ।

राज्यका हरेक निकायमा समानुपातिक सहभागिताको आवाज उठाए तर संविधान यस विषयमा मौन रह्यो । ५१ प्रतिशत महिलाको आवाज प्रति गम्भिर नहुनु दुखद हो ।
तर,पनि संविधान आफैमा गतिशिल दस्तावेज हो । लामो समयदेखि समान अधिकारको लागि आन्दोलनरत महिला संविधान जारीसँगै पक्कै चुपलाग्ने छैनन् । सामाजिक,सांस्कृतिक र आर्थिक क्रान्तिबाट अधिकारको आवाज महिलाले उठाईरहनेछन् । अधिकार प्राप्तिका लागि जारी आन्दोलन रोकिएको छैन ।
नेपालीको समृद्धि र उन्नतीलेनै नेपाल सफल राष्ट्र बन्न सक्छ चुनौतिभित्रका अवसर, कठिनाई भित्रका सहजता र प्रतिकूलताभित्र अनुकूलता देख्न सक्नुनै उपलब्धि हो ।

durga neupane

दुर्गा न्यौपाने
मानव अधिकारका लागि एकल, एकल महिला समूह क्षेत्रीय : अध्यक्ष

एक युगमा एक दिन एक चोटी आउँछ, भनेर भन्ने गरिन्थ्यो । त्यो दिन असोज ३ गते आयो । भलै यो पूर्ण र संपूर्ण छ भन्न सकिदैन । बेमेलभित्रका मेलहरूको दस्तावेज हो । गणतान्त्रिक संविधानलाई संस्थागत गर्ने कार्यलाई एउटा महत्वपूर्ण उपलब्धि मान्न सकिन्छ । शान्ति स्थापनाका लागि संक्रमणकालको टुंगो लागेको छ । संविधान आफैंमा एउटा गतिशिल, परिवर्तनशिल र अग्रगामी प्रकृतिको छ । विश्वकै इतिहासमा नेपालले शिर ठाडो पार्ने समय जुरेको छ ।

संविधानले सामाजिक न्याय र समावेशीकरण सम्बन्धी नीतिमा असहाय अवस्थामा रहेका एकल महिलालाई रोजगारीमा प्राथमिकता दिएर जीविकोपार्जनको व्यवस्था गर्दै जाने, जोखिममा परेका, सामाजिक र पारिवारिक बहिष्करणमा परेका तथा हिंसा पीडित महिलालाई पुनःस्थापनासँगै संरक्षण, सशक्तिकरणको पाटो जोडिनु सकारात्मक हो । यद्यपी कार्यान्वयनको पक्षले यसको गुण र दोषलाई केलाउँछ ।

लामो समयपछिको परिवर्तनलाई संस्थागत गर्दा चुनौति आउनु अस्वभावीक होईन । अब विस्तारै यसमा देखा परेका असन्तुष्टिहरूलाई आवश्यकता अनुसार थप्दै वा घटाउँदै जानुपर्छ ।

महिला अझै उपेक्षित हुनु, महिलाको अस्तित्व र अधिकारमाथि प्रश्न चिन्ह उठाउँदै विभेद गरीनु यो संविधानको सबैभन्दा दुखद पक्ष हो । सँगसँगै मधेश जलिरहनु, प्रदेशको सिमाङ्कन र नामाङ्कन अझै बाँकी रहनु आदि संविधानका बग्रेल्ति चुनौतिहरू औंल्याउन सकिन्छ ।
यतिबेला कमजोरी केलाउनु भन्दा पनि उपलब्धिलाई संस्थागत गर्नु बढि बुद्धिमानी हुँनेछ । जसले शान्ति संस्थागत गर्न मद्दत पुग्नेछ । अब संविधानले बिकास र निकासको ढोका खोलिदिएको छ ।

maya gurung manangiमाया गुरुङ मनाङ्गी
जिल्ला विकास समिति कास्की : सामी परियोजना प्रमुख
संविधान सभा मार्फत संविधान जारी गर्नका लागि नेपाली जनताले विभिन्न आन्दोलन गर्दै आएका थिए । त्यो पुरा भएको छ । एउटा अन्योलताको अवस्था अन्त्य भएको छ । देशले निकाशा पाउँछ भन्ने आम नागरिकलाई लागेका छ । देशभर स्वस्फूर्त रुपमा संविधानको स्वागतका लागि दिपप्रज्वलन गरेका दृश्यले पनि यो संकेत गर्छ ।

हुन त यस संविधानले सबै नेपालीहरूको मन बुझाउँन सकेको छैन । हामीले चाहेको जस्तो अधिकार यसमा सुनिश्चित गर्न सकेको छैन । महिला अधिकारकर्मीहरूले उठाएका मागहरूको पूर्ण रुपमा संबोधन हुन सकेन, यसमा हामी महिलालाई दुखि बनाएको छ । तर, पनि हामीले यसलाई सकारात्मक रुपबाट स्वीकार गरेका छौँ ।
विश्वास छ आउने दिनहरूमा समय सापेक्ष संसोधन र समेट्न नसकेका बिषय बस्तुहरू, ५१ प्रतिशत महिलाको आत्मसम्मान र अधिकारलाई समेटेर जाने छ ।
नयाँ संविधानले दोश्रो दर्जाको नागरिक सरह भोग्नु परेका अनगिन्ति विभेदहरूको अन्त्य गर्दै कानुनको पूर्ण कार्यान्वयन होस् भन्ने कामना गर्छु ।

प्रकाशित मिति २०७२ असोज ४ गते साेमवार

    Comment Here!

Related NEWS
मुख्य खबर

पत्रकार मृत फेला

-महिला खबर- पत्रकार निर्मला पहराई शुक्रबार मृत फेला परेकी छिन् ।

बैठकमा महिला सहभागिता नभएकोमा चिन्ता

-महिला खबर- गैर आवासीय नेपाली संघले अमेरिका क्षेत्रको क्षेत्रीय बैठकमा महिलाको सहभागिता हुन नसकेको विषयप्रति ध्यानाकर्षण

खाद्यान्न सहयोग

अछामको मंगलसेन नगरपालिकाका दुई वडामा ६० जना विपन्न एकल महिलालाई अछाम जेसिजले खाद्यान्न सहयोग गरेको

सुरक्षित मातृत्व तथा प्रजनन् स्वास्थ्य अधिकार नियमावली स्वीकृत

काठमाडौँ । सुरक्षित मातृत्व तथा प्रजनन् स्वास्थ्य अधिकार ऐन, २०७५ लागु भएको तीन वर्षपछि नियमावली

उद्यमी महिलालाई अनलाइन बजारीकरण र ऋणमा समस्या

-महिला खबर- कोभिड-१९ को असरका कारण ऋण चुक्ता गर्न नसकेको र कर्मचारीलाई तलव दिन समस्या भएको

Read more
ताजा अपडेट
© 2015.All rights reserved by mahilakhabar.com
%d bloggers like this: