हिंसा र विभेदमा नायिकाहरू


प्रकाशित मिति :2015-11-01 13:29:22

एउटा चलचित्रमा नायकले नायिकालाई अनेक समस्याबाट बाहिर निकाल्न सहयोग गर्छ तर वास्तविक जीवनमा नायिकाहरूले त्यो सहायता पाउँदैनन् ।
हरिजंग थापा

Priyanka Karkiप्रियंका कार्की अहिलेकी व्यस्त नायिका मध्ये एक हुन् । चलचित्र झोलेसँगै सफलताको सिँढीमा उक्लिएकी उनी अमेरिकाको ग्रीनकार्ड त्यागेर स्वदेश फर्केकी हुन । अमेरिका बसाईमा चलचित्र सम्बन्धी ज्ञान हासिल गरेकी प्रियंकाले त्यहाँ सिकेको सीपले दक्षता र आत्माविश्वास बढाएको बताइन् ।

प्रियंकाले अभिनय गरेका चार चलचित्र ‘करोड क्लब’मा प्रवेश गरे । उनी अभिनीत झोले, नाई नभन्नु ल २, नाई नभन्नु ल ३ र वडा नम्बर ६ ले करोड रुपैयाँ भन्दा बढी कमाएका छन् । दक्षता र आत्माविश्वास भएपछि हिंसा र विभेद गर्ने आँट कसैको हुन नसक्ने उनी बताउँछिन् । आफू सक्षम भएपछि मात्र यो क्षेत्रमा प्रवेश गर्न उनको अरुलाई सुझाव छ ।

यस्तै मान्यता राख्छिन्, नायिका निशा अधिकारी । उनी सर्वोच्च शिखर सगरमाथा आरोहणपछि अफ्रिकाको उच्च हिमाल किलीमान्जरो आरोहण गरेर फर्केकी छन् । निशा भन्छिन्, ‘सिने क्षेत्रमामात्र होईन समयमा तलब नपाउने समस्या अरु क्षेत्रमा पनि छ । बोल्ने आँट र अधिकारप्रति सचेत भएमा यस्ता समस्या आँफै समाधान हुन्छन् ।’

परेर पाका बनेका रेखा थापा, करिश्मा मानन्धर, झरना थापाको पनि अनुभव यस्तै छ । पारिश्रमिक विभेदको महशुस भने सबैले गरेका छन् । चलचित्रका मुख्य पात्र नायक र नायिकाको उत्तिकै महत्वपूर्ण भूमिका हुन्छ । तर, पारिश्रमिकमा भने निकै अन्तर हुने गर्छ ।

सिने क्षेत्रमा पारिश्रमिकमा हुने विभेद अन्त्य हुनुपर्छ भन्ने कुरा तात्दै सेलाउँदै गर्छ । तर यसको मारमा नायिकाहरू पर्ने गरेको प्रियंका कार्की बताउँछिन् । नायिका कार्की भन्छिन्, ‘पारिश्रमिक विभेद अहिलेको अवस्थामा स्वभाविक हो । जति नै दक्ष भएपनि फिल्मको बजेट हेरेर काम गर्नुपर्छ, होइन भने बेरोजगार हुने अवस्था छ ।’ यो क्षेत्रमा आफैँ पैसा हालेरै फिल्म खेल्न तयार हुनेहरू पनि प्रशस्तै भएकोले नायिकाले थोरै पारिश्रमिकमा काम गर्नुपर्ने बाध्यता छ ।’

महिला कलाकार मञ्चकी अध्यक्ष मौसमी मल्ल ‘चर्चा र लोकप्रियताका लागि सिने क्षेत्र रोजिने भएकाले इज्जत जाने डरले हिंसा र विभेदका कुरा बाहिर नआएको’ बताउँछिन् । गएको वर्ष मञ्चमा हिंसा र विभेदका २० वटा उजुरी परेका थिए । यसवर्ष अहिलेसम्म दुई वटा उजुरीमात्रै आएका छन् । ती उजुरी पारिश्रमिक नदिएको र फिल्मबाट निकालिएको विषयमा रहेका छन् । मञ्चको पहलमा उनीहरूको समस्या समाधान गरिएको अध्यक्ष मल्लको भनाई छ । प्रतिकार गर्ने र अधिकारबारे सचेत भएमा हिंसा र विभेद कम गर्न सकिने उनको विश्वास छ ।

Bikash Acharya Directorचलचित्रकर्मी एवं समिक्षक मनोज पण्डित भन्छन् ‘व्यक्तिवादी प्रवृत्ति नेपाली सिने क्षेत्रमा हावी छ । एउटा व्यक्तिको चाहाना, सनक र खर्चले फिल्म बन्ने अवस्था रहेकाले हिंसा समस्याको रुपमा  रहेको छ ।’ उनी भन्छन् ‘प्रचारका नाममा नायिकाको खुलेआम गलत प्रयोग हुने गरेको छ, जसले गर्दा नायिकाहरू यौनजन्य हिंसामा पर्ने सम्भावना धेरै हुन्छ ।’

डेब्यु सिनेमाबाट नै एउटा नायिकाको नाम निर्माता, निर्देशक र नायकसँग जोडिन्छ । जसले नायिकाको पुरै जिन्दगीमा प्रभाव पार्न सक्छ । त्यसैले परिवार, नाता र समाजले यो क्षेत्रलाई नै विकृत देख्छ । यहि समस्याको सिकार भएर नेपाली सिने क्षेत्रका केही नायिकाले आत्महत्या समेत गरिसकेको छन् । हिंसा र विभेद भएको भनेर केही उजुरीहरू पनि पर्ने गरेका छन् । तर, केही दिनपछि ती आँफै सेलाउने गर्छन् । अन्य फिल्ममा अवसर नपाइने डरले कतिपय नायिका चुपचाप हिंसा सहन बाध्य हुन्छन् ।

सिनेमा निर्माण गर्दा व्यापारलाई मुलआधार बनाउने हुँदा यसले नायिकाहरूलाई हिंसा र विभेदको सिकार बनाउने पण्डितको बुझाइ छ । चलचित्रको कथावस्तुमा मात्र होइन, वास्तविक रुपमानै नायिकालाई हेप्ने प्रवृति नेपाली सिनेमा क्षेत्रमा छ । सौन्र्दय र शरीरलाई प्राथमिकतामा राखेर महिलालाई फिल्ममा परिक्षण गरिँदा  समस्या आउँछ । एउटा फिल्ममा अभिनय गरेपछि उनीहरू सामाजिक व्यक्तित्व बन्छन् । पुरानो पृष्ठभूिममा फर्कन गाह्रो पर्छ । त्यसैले हिंसा र विभेदका बाबजुद चुपचाप सिने क्षेत्रमा रहने प्रयास गर्छन् ।

कथाको पात्र अनुसारको कलाकार छनौट गर्ने, पात्रको भूमिका अनुसारको पारिश्रमीक दिने हो भने विभेद अन्त्य हुने निर्देशक विकास आर्चाय बताउँछन् । उनी भन्छन्, ‘नाई नभन्नु ल ४ का लागि कलाकार छनोट गर्दा मैले यो प्रयास गरेँ । गुणस्तरीय फिल्म निर्माणमा पनि यसले सहयोग पुर्‍याउने देखियो । नायिकामात्र होईन यस्तो व्यावसायिक तरिका अपनाउने हो भने कुनै पनि कलाकार विभेद र हिंसाको सिकार हुनु नपर्ने रहेछ ।’

Manoj Pandit Film Critcहिंसा सहेर बस्नु भन्दा प्रतिकार गर्ने हिम्मत बढाउनु जरुरी छ । हिंसा र विभेदको प्रतिकार गर्नेलाई तिरस्कार होईन सम्मानको खाँचो छ । आफूमाथि भएको हिंसा र विभेद सहन नसकेर सुन्दर सपना बोकेर सिने क्षेत्र प्रवेश गरेका सुन्दरीहरूले जीवन त्याग गरेका छन् । श्रीषा कार्की, जेशीका खड्का यसका उदाहरणहर हुन् ।

त्यसैले, रुचीको क्षेत्रमा होमिनु अघि केहि जानकारी राखेमा आत्मविश्वास बढ्छ । आत्मविश्वासले दक्षता दिलाउँछ । दक्षताले अवसर पैदा गर्नुका साथै व्यावसायिक बनाउँछ । दक्षता र व्यावसायिकताले नै यस्ता हिंसा र विभेदबाट टाढा रहन मद्दत गर्छ । नारी पात्रलाई यौनको प्रतिबिम्ब, व्यापारको हतियारमात्र बनाउने प्रवृति नरोकिने हो भने चलचित्र क्षेत्र अझै बदनाम हुँदै जानेछ ।

प्रकाशित मिति: २०७२ कात्तिक १५ गते अाईतवार

    Comment Here!

Related NEWS
मुख्य खबर

हिंसा र पारिवारिक खटनको शोक छ! गरीबी र चेतनाविहिनताको रोग छ!

-ललिता साह- राजविराज नगर पालिका वडा न. ८ की निकिता यादव १७ महिना को अन्तरालमा दुईवटा

सञ्चारिका समूहको साधारणसभा सम्पन्न

-महिला खबर- सञ्चारिका समूहको २४ औं वार्षिक साधारणसभा आज काठमाडौंमा भर्चुअल रुपमा सम्पन्न भएको छ ।

ससंकटमा छोरी सन्तान

-बिशाल सुनार- दैलेख । लिङ्ग पहिचानसहितको गर्भाधान होस् वा गर्भपतन कानुनतः अपराध हो । तर पनि

सुगा

-कविता राई- आँखामा सक्कली निरीहता ओढेर बाँचिरहेछु सृष्टिभ्रम असती समयको जाँतोले किचिएर पिलिएको छातिबाट ओकलिरहेछु अप्राकृतिक लय !

‘लैङ्गिक उत्तरदायी तथा समावेशी जैविक विविधता संरक्षण’ सम्बन्धि भर्चुअल सम्मेलन सम्पन्न

-महिला खबर- “लैङ्गिक उत्तरदायी तथा समावेशी जैविक विविधता संरक्षण” सम्बन्धि भर्चुअल सम्मेलन देशभरको पच्चीस जिल्लाबाट करिब

Read more
ताजा अपडेट
© 2015.All rights reserved by mahilakhabar.com
%d bloggers like this: