महिला खबर

काठमाडाैं, कात्तिक  २३। राष्ट्रपति विद्या  भण्डारीले  संविधानको सर्वोच्चतालाई ध्यानमा राख्दै समग्र राष्ट्रको सामाजिक सद्भाव कायम गरी राष्ट्रिय एकतालाई बलियो बनाउन निरन्तर क्रियाशील रहने बताउनुभएको छ ।  राष्ट्रपति कार्यालय शीतलनिवासमा राष्ट्रिय महिला आयोगले आयोजना गरेको बधाई तथा शुभकामना आदान–प्रदान कार्यक्रममा राष्ट्रपति भण्डारीले नयाँ संविधानको कार्यान्वयनसँगै आफूलाई दिएको जिम्मेवारी इमान्दारीका साथ पूरा गर्ने बताउनुभयो ।

‘संविधानले दिएको अधिकारलाई प्रयोग गर्दै कुनै एउटा समुदायका लागि मात्रभन्दा पनि समग्र राष्ट्र र राष्ट्रियताको विकाससँगै एकताको पक्षमा सबै नेपालीको भावनाअनुसार नै काम गर्ने छु’, राष्ट्रपति भण्डारीले भन्नुभयो । उहाँले समाजमा रहेका विभेदलाई चिर्दै मुलुकको आर्थिक, सामाजिक र सांस्कृतिक विकासको बाटोमा अग्रसर हुनुपर्नेमा समेत जोड दिनुभयो ।

यस अवसरमा राष्ट्रिय महिला आयोगकी प्रवक्ता मनु हुमागाईंले वर्तमान चुनौतीपूर्ण अवस्थामा रहेको सङ्घीय लोकतान्त्रिक गणतन्त्र नेपालको राष्ट्रपति पदमा पहिलो महिला राष्ट्रपति हुनुभएकामा सफल कार्यकालको शुभकामना दिनुभएकाे थियो ।

आयोगका सचिव लेखबहादुर कार्कीले नेपाली महिलाको सामाजिक, सांस्कृतिक, राजनीतिक र आर्थिक अधिकार कायम गर्न राष्ट्रपतिको महत्वपूर्ण भूमिका हुने बताउनुभयो ।

प्रकाशित मितिः २०७२ कात्तिक २३ गते साेमवार