ज्ञानु पंगेनी

नवलपरासी । १३ वर्षीया बालिकालाई सामूहिक बलात्कार गर्ने अभियुक्तहरूलाई  पक्राउ नगरेपछि कारवाहीको दायरामा ल्याउन माग गर्दै शनिबार कावासोतीमा सयौंको संख्यामा महिलाले प्रदर्शन गरे ।

घटना भएकोे १० दिन वितिसक्दा पनि दोषीलाई पक्राउ  नगरेपछि महिला आन्दोलनमा उत्रिएका हुन् ।

संयुक्त संघर्ष समिति बनाएर प्रदर्शनमा उत्रिएका  महिलाले कावासोतीको फलफूल चोकदेखि र्‍याली निकालेर कावासोती नगरपरिक्रममा गरेका थिए ।

बलात्कारीलाई  पक्राउ गरी कडा कारवाही गर्नुपर्ने , पीडित बालिकाको निःशुल्क उपचारको व्यवस्था गर्नुपर्नेलगायतका नारा लगाउँदै  प्लेकार्ड सहित नगर परिक्रमा गरेर  इलाका प्रहरी कार्यालय नवलपुर अगाडि उनीहरूले कोणसभासहित  २ घण्टा  धर्ना दिएका थिए ।

दोषीलाई पक्राउ गरी कारवाही नगरे थप सशक्त आन्दोलन गर्ने संघर्ष समितीले जनाएको छ ।  चैत १८ गते साँझ १३ वर्षीया बालिकालाई ३ जना युवाले सामूहिक बलात्कार गरेका थिए । घटनापछि पीडितले किटानी जाहेरीसहित उजुरी दिएपनि प्रहरीले उनीहरूलाई पक्राउ गरेको छैन ।