महिला खबर

कञ्चनपुर । पश्चिमी सीमा नाका गड्डाचौकीबाट भारततर्फ जाँदै गरेका छ जना महिलाको शनिवार  उद्धार गरिएको छ । माइती नेपाल कञ्चनपुर र प्रहरीको संयुक्त प्रयासमा सीमा नाका हुँदै भारततर्फ जान लागेका युवतीको उद्धार गरिएको हो ।

उनीहरूलाई नयाँदिल्ली पुर्याइदिने भन्दै युवतीसँगै जाँदै गरेका ५० वर्षीय माईबहादुर तामाङलाई प्रहरीले नियन्त्रणमा लिई अनुसन्धान गरिरहेको छ ।

भारत हुँदै कुवेत र इराक जाने भन्दै हिँडेका धादिङका तीन, म्याग्दीका दुई र काठमाडौँका एक गरी छ जना महिलाको उद्धार गरिएको माइती नेपाल कञ्चनपुरका संयोजक महेश्वरी भट्टले जानकारी दिनुभयो । भारतीय नम्बरको जिपमा भारत जाँदै गरेका बेला  जोखिममा पर्न सक्ने भन्दै  उनीहरूलाई तत्काल उद्धार गरिएको उहाँले बताउनुभयो । उद्धार गरिएका महिला २० देखि ३० वर्ष उमेरका छन् । उनीहरू माइती नेपालको संरक्षणमा छन् ।

उनीहरूबाट काठमाडौँमा रहेका दलालले  ७५ देखि  ८० हजार  रुपैयाँ  लिएको उद्धार गरिएका महिलाले बताएका छन्  । असार महिनामा मात्रै माइती नेपाल कञ्चनपुरले ४६ जना बालबालिका तथा युवतीको उद्धार गरेको जनाएको छ ।