महिला खबर
कपिलवस्तु । राष्ट्रिय महिला अधिकारमञ्च कपिलवस्तुले लैंगिक हिंसा पीडितका लागि मल्हम पट्टी लगाउने काम सुरु गर्ने  भएको छ । सोमवार जितपुरमा वसेको मञ्चको वैठकले उक्त कुराको निर्णय गरेको हो ।   मञ्चका अध्यक्ष राधा पौडेलको अध्यक्षतामा बसेको वैठकले लैंगिक हिंसा  अन्त्यका लागि दैनिक खुत्रुके रकम संकलन गर्ने निर्णय गरेको छ ।  हिंसा न्युनिकरणका लागि दिनको एक रुपैयाँ मञ्चका सदस्यले जम्मा गर्ने भएका छन् । उक्त रकम खुत्रेकेमा जम्मा गरिने छ । पैसा जम्मा गर्न  ३ वटा खुत्रुके  सोमबारबाटै राखिएको छ । यसमा जो कोहीले  दैनिक एक रुपैयाँ खसाल्न सक्ने छन् ।

‘एक थुकी सुकी , हजार थुकी नदी’ भने झै एक रुपैयाँको शुरुवातले महिला हिंसा न्युनिकरणका लागि ठुलो आर्थिक सहयोग हुने अपेक्षा मञ्चले गरेको छ । खुत्रुके अभियान अन्तरगत संकलित रकम  मञ्चकै अगुवाईमा  लैंगिक हिंसा पीडितलाई सहयोग गरिने छ  । वैठकले आउँदो भदौ १२ गते जिल्लामा  सरोकारवाला निकाय, संघ संस्था, संचारकर्मी सवैलाई राखी  अभियानलाई थप तिव्रता दिने निर्णय पनि गरेको छ ।