बसमै जुम्ल्याहा जन्माएकी कमला विच्चलीमा


अन्र्तजातिय विवाहः कमलाले पाइनन् श्रीमानको साथ

प्रकाशित मिति :2017-08-29 16:39:15

– सन्दिप वि.क –

काठमाडौं । ताप्लेजुङकी २० वर्षीया कमला वि.क श्रीमान आउने आशमा गत हप्तासम्म धरानमा कुरेर बसिराखेकी थिइन् ।  उनलाई थाहा थियो, यहि महिना आफू सुत्केरी  हुँदैछु भनेर ।

कमलाले श्रीमान रविलाई हरेक दिन फोन गर्थिन, तर जहिले फोन गर्दा की मोबाईल स्वीच अफ गर्थे, कि फोन लाग्यो भनेपनि जेसुकै गर् भनेर धम्कि दिन्थे । कमलाले केही महिनाअघि महिला खबरसँग कुरा गर्दै ‘म यस्तो दुईजिउकी कता जाऊ ।’ भन्दै दुःख पोखेकी थिइन् ।

श्रीमान लामो समयसम्म नआएपछि कमला यही भदौ ५ गते धरानबाट माइतिगाउँ ताप्लेजुङ जान बस चढेकी थिइन् ।

बसमा कमलाको न कुनै आफन्त थिए, न कुनै चिनेजानेका मान्छे । सबै यात्रु अपरिचित थिए ।

बस इलामको फिक्कल बजार पुग्नै लाग्दा कमलालाई सुत्केरी व्यथाले च्याप्यो । एकछिन बसमा होहल्ला मच्चियो । त्यहि उनले जुम्ल्याहा बच्चा जन्माइन् ।  कमलाले भनिन् –‘चिनेका कोही थिएनन् । साह्रै गाह्रो भयो ।’ इलाम पुग्दा बसका यात्रुहरुले कमलालाई त्यहाँको पुलिस, प्रशासनलाई जिम्मा लगाए ।

स्थानीय प्रहरीले कमलाको श्रीमानलाई फोन गर्न प्रयास गर्यो तर उनी आएनन् । कहिले काहाँ छु, कहिले काहाँ छु भनेर टारे । कमलालाई त्यहाँ आमा समूहको संरक्षणमा राखिएको थियो ।

श्रीमान नआएपनि ताप्लेजुङबाट कमलाका दाजु हिमाल बहिनीलाई लिन इलाम आए । रविले अहिले बच्चा आफ्नो नभएको भन्दै बलजफ्ति भिडाउन खोजेको आरोप लगाएको कमलाले बताइन् ।

छोरी हुर्काउने चिन्ता

जुम्ल्याहा सन्तान जन्मिएसगैँ कमलालाई अहिले सन्तान हुर्काउने चिन्ता छ । श्रीमान सम्पर्कमा छैनन् ।  ‘माइत कति बस्ने, कमलाले भनिन् –छोरीहरुलाई हुर्काउनुपर्यो, पढाउनुपर्यो । कसरी पाल्ने । श्रीमान वेपत्ता छन् । न त श्रीमानको परिवारले नै स्विकारेको छ । चिन्तामाथि चिन्ता थपिएको छ ।’

रविसँगको यात्रा

कमलाले गत माघमा उदयपुरका रवि श्रेष्ठसँग प्रेम विवाह गरेकी थिइन् । विवाहपछि रविले कमलालाई आफ्नो घर लगेनन् । केही महिना तेह्रथुममा आफन्तसगैँ राखेका थिए ।  गत साउनमा रविले गर्भवती कमलालाई धरानको एउटा होटेलमा राखेर आफू सम्पर्क विहिन बनेका थिए ।

अलपत्र बनेकी कमलालाई धरानका महिलाहरुले उद्दार गरेर प्रहरी मार्फत पुनः रविलाई नै जिम्मा लगाएका थिए ।प्रहरीले कमलालाई जिम्मा लगाएपछि रविले पहिलो पटक श्रीमतीलाई आफ्नो घरमा लगे, तर परिवारले स्वीकारेनन् ।

कमलाले भनिन्–‘वेपत्ता भएका श्रीमानलाई महिलाहरु र प्रहरीले सम्पर्कमा त ल्याइदिए, तर सासु सुसुराले तल्लो, नछुने जातको केटी ल्याएको भन्दै मलाई घरभित्र भित्राउन मानेनन् ।’

परिवारले नस्वीकारेपछि कमला धरानमै अन्टिको घरमा बस्दै आएकी थिइन् । परिवार र श्रीमानको साथ नपाएपनि नागरिकता बनाइदिन आग्रह गरेकी उनले नागरिकता समेत पाएकी छैनन् । श्रीमान बसका चालक हुन् ।

    Comment Here!

Related NEWS
मुख्य खबर

छोरी

-अन्शु खनाल- प्यारी छोरी जन्मनु आफैमा जित्नु हो यसमानेमा जिन्दगीको सुरुवात जित बाटै गरेकी हौ तिमीले पनि ।

थाहा थिएन

-अनिता महर्जन- थाहा थिएन आमा पराइ घरको जिवन शैली सोचेको थिएँ आफ्नै जस्तै हुन्छ कि भनेर

नारी सहास र सृजनाको स्रोत

-अञ्जना दास परियार- परोपकारी मन, भावना र कार्यले सुनौलो विश्व-इतिहास रच्न सफल मदर टेरेसा नारी तिनी ।

अधिकारीले दायर गरेको रिटमा सर्वोच्चको कारण देखाउ आदेश

-महिला खबर- ललितपुर । गोरखापत्र संस्थानको प्रधान सम्पादक नियुक्तिका विषयमा परेको रिट निवेदनमा सर्वोच्च अदालतले कारण

समाज सेवा र हाम्रो परिवेश

-हिरा दाहाल- बर्दियाकि बहिनी भात खान नपाएर देह त्याग गर्न विवश देशमा समाज सेवा गर्छु भन्न पनि लाज

Read more
© 2015.All rights reserved by mahilakhabar.com
%d bloggers like this: