टिनको छाप्रोभित्र गाई गोरुसँगैको बास


प्रकाशित मिति :2018-01-14 15:53:15

-इन्द्रसरा खड्का-

बैतडी । घरभित्र पस्ने मूल ढोका एउटै छ । एकातिर गोरु बाख्रा, अर्कोतिर आमासँगै तीन छोराछोरी बस्छन् । सुतेको बेला गोरु, बाख्राले दिसापिसाब गर्दा कहिलेकाहीँ त शरीरमै पर्छ । ‘खाना खाने बेला त घरबाहिर निस्केर खान्छौं । तर सुतेको बेला कतिखेर गोरु, बाख्राले शरीरमा दिसापिसाव गर्छन् थाहै हुदैन’ बैतडीकी लक्ष्मी बिजलेले भनिन् ।

वरिपरी गहुँ छरेको बारी । बिचमा सानो टिनको झुप्रो । टाढाबाट झट्ट हेर्दा गोरुको गोठ जस्तै देखिने यो घर बैतडीको दशरथचन्द नगरपालिका वडानम्बर २ का लक्ष्मी बिजलेको हो । पुस महिनाकोे कठ्यांग्रिदो चिसो । यस्तो चिसोमा गोरु, बाख्राको छेउमा रात बिताउनु लक्ष्मीको बाध्यता हो ।

हिउँदमा टिनको छाप्रोमा खपि नसक्नु चिसो । वर्षातमा ओत लाग्नै मुस्किल । लक्ष्मी बिजलेले टिनको यही झुपडीमा ८ वर्ष बिताइन् । पहिले घरबार सबै राम्रो थियो । जब श्रीमानको निधन भयो, त्यसपछि लक्ष्मीका दुखका दिन सुरु भए । ‘श्रीमान बितेपछि आफै छोराछोरी पाल्छु भन्ने हिम्मत थियो । तर घरमा आगलागी भएर बारीको बास भएपछि हिम्मतले पनि हारखादै गयो ।’ उनले दुख पोखिन् ।

लक्ष्मीका श्रीमान बितेको १४ वर्ष भयो । उनका २ छोरा १ छोरी छन् । उनी बस्दै आएको ४ कोठे घर २०६४ सालमा आगोबाट ध्वस्त भएपछि लत्ताकपडा, खाद्यान्न केही हात लाग्ने कुरै भएन । जिल्ला प्रशासन कार्यलयबाट राहतस्वरुप आएको ७ हजार रुपैयाँ र एक त्रिपाल चार जना परिवारको लागि हात्तीको मुखमा जिरासरह भयो ।

एक त विधवा, त्यसैमा तीन जना छोराछोरीको अभिभारा पनि लक्ष्मीकै काँधमा छ । ओत लाग्ने घरसमेत आगोले सखाप परेपछि गिट्टी फोडेर, घन सब्बलले ढुंगा निकालेर बल्ल तल्ल ३५ हजार रुपैयाँ जम्मा गरिन् । र टिनको छाप्रो लगाएर लक्ष्मीले आफूहरूको वास तयार गरिन् ।

लक्ष्मीको श्रीमानका चार दाजुभाई छन् । दाई बितिसकेपछि देवरहरूले संरक्षण गर्नुको साँटो उल्टै जग्गा जमिन सबै कब्जा गरेपछि आफूसँग घर बनाउने जमिन पनि नभएको उनले बताइन् ।

‘श्रीमान हुँदा कसैले केहि भनेनन् । परिवार पाल्न जग्गा जमिन टन्न थियो । उहाँको निधनपछि सबै जमिन देवरले कब्जा गरि आफ्नो नाममा दर्ता गर्नुभएछ’ लक्ष्मीले भनिन्, ‘बस्नलाइ घर र कमाइ खान जग्गा जमिन नभएपछि जेठो छोरालाई गाउँको मान्छेसंगै भारत पठाएकी छु ।’

गाउँको मान्छेले म पालिदिन्छु भनेपछि छोरालाइ छिमेकिसँगै भारत पठाएको उनले बताइन् । अहिले उनीसंग एक छोरा र एक छोरी छन् । छोरी ८ कक्षामा पढ्छन् भने छोरा ७ कक्षामा । छोराछोरीलाई कापि किताव किन्न, विद्यालयको ड्रेस किन्न पनि धौ–धौ हुने गरेको उनले बताइन् । ‘कापी किताब किन्न पैंसा हुन्न । स्कुल छुटाइदिउँ भने सँगैका साथीभाई स्कुल जान्छन् । के गरौं, कसो गरौं, समस्याको चाङ छ’ उनले सुनाइन् ।

    Comment Here!

Related NEWS
मुख्य खबर

हिंसा र पारिवारिक खटनको शोक छ! गरीबी र चेतनाविहिनताको रोग छ!

-ललिता साह- राजविराज नगर पालिका वडा न. ८ की निकिता यादव १७ महिना को अन्तरालमा दुईवटा

सञ्चारिका समूहको साधारणसभा सम्पन्न

-महिला खबर- सञ्चारिका समूहको २४ औं वार्षिक साधारणसभा आज काठमाडौंमा भर्चुअल रुपमा सम्पन्न भएको छ ।

ससंकटमा छोरी सन्तान

-बिशाल सुनार- दैलेख । लिङ्ग पहिचानसहितको गर्भाधान होस् वा गर्भपतन कानुनतः अपराध हो । तर पनि

सुगा

-कविता राई- आँखामा सक्कली निरीहता ओढेर बाँचिरहेछु सृष्टिभ्रम असती समयको जाँतोले किचिएर पिलिएको छातिबाट ओकलिरहेछु अप्राकृतिक लय !

‘लैङ्गिक उत्तरदायी तथा समावेशी जैविक विविधता संरक्षण’ सम्बन्धि भर्चुअल सम्मेलन सम्पन्न

-महिला खबर- “लैङ्गिक उत्तरदायी तथा समावेशी जैविक विविधता संरक्षण” सम्बन्धि भर्चुअल सम्मेलन देशभरको पच्चीस जिल्लाबाट करिब

Read more
ताजा अपडेट
© 2015.All rights reserved by mahilakhabar.com
%d bloggers like this: