श्रीमानबाटै असुरक्षित छन् महिला


प्रकाशित मिति :2018-03-12 14:11:50

–सन्दिप वि.क–

ललितपुर । तेह्रथुमको आठराई गाउँपालिका–४ इवामा गत शुक्रबार एक महिलालाई श्रीमानले हत्या गरे ।

बर्दिया बासगडी नगरपालिका–५ असनेरी घर भई मध्यपहाडी लोकमार्गकोे आठराई खण्डमा मजदूरीका लागि आएका ४० वर्षीय गोविन्द ओलीले ३० वर्षीया श्रीमती चन्द्रकला ओलीको हत्या गरेका हुन् ।

हत्या गर्ने श्रीमान ओलीलाई इलाका प्रहरी कार्यालय संक्रान्तिबजारले पक्राउ गरि जिल्ला प्रहरी कार्यालयमा बुझाएको प्रहरी प्रमुख डम्बर पुरीले बताए ।

जिल्ला प्रहरी कार्यालय तेह्रथुमका डिएसपी राजन भुजेलका अनुसार मादकपदार्थ सेवन गरेका श्रीमान–श्रीमतीबीच भएको विवाद पछि आवेशमा आई श्रीमतीको कञ्चटमा मुक्का प्रहार गर्दा श्रीमतीको मृत्यु भएको थियो ।

हत्या गर्ने श्रीमानलाई थप अनुसन्धानका लागि जिल्ला अदालतमा म्याद थप गर्ने तयारी भइरहेको डिएसपी भुजेलले बताए ।
उनले भने, ‘ओलीको अनुसन्धान भइरहेको छ’ घरझगडाकै कारण श्रीमतीको हत्या भएको उनले बताए ।

ओलीको परिवार गत कात्तिकदेखि केजी निर्माण कन्सल्टेन्सीद्वारा निर्माण भइरहेको मध्यपहाडी लोकमार्गअन्तर्गत आठराई सडकखण्डमा मजदूरी गरिरहेका थिए ।

यसैबीच मोरङको लेटाङ नगरपालिका–२ बुधबारे बस्ने ३७ वर्षीया कौशिला राई आइतबार बिहान मृत फेला परिन् ।
शनिबार राति श्रीमानसँग झगडा भएको र राई आफ्नै घरको कोठामा मृत भेटिएको भन्ने जानकारी स्थानीयवासीले प्रहरीलाई गराएका थिए ।

मृतक राईको शरीरका विभिन्न भागमा चोट रहेकाले घटना शंकास्पद रहेको इलाका प्रहरी कार्यालय लेटाङका प्रहरी निरीक्षक खगेन्द्र खड्काले जानकारी दिए ।

उनले भने, ‘शव आफन्तले बुझिसकेका छन् । घटना हेर्दा हत्या भएको देखिन्छ । टाउको चोट लागेको छ भने शरीरमा निलडाम छ ।’ घटनापछि मृतक राईका श्रीमान् ३७ वर्षीय कुमार राई फरार छन् । उनको खोजी भइरहेको निरीक्षक खड्काले बताए ।

पाँचथरमा पनि आफ्नै श्रीमतीको हत्या गरेको अभियोगमा फिदिम नगरपालिका–३ सिलौटेका ६२ बर्षीय डिक बहादुर मुखियालाई प्रहरीले पक्राउ गरेको छ ।

मादक पदार्थ सेवन गरेका मुखियाले फागुन ५ गते ४५ बर्षीया श्रीमती गंगामाया मुखियालाई कुटपिट गरेको र सोही दिनदेखि गंगामाया बेपत्ता भएको भनी स्थानीय बासिन्दाहरुले प्रहरी चौकी पौवामा निवेदन दिएका थिए ।

प्रहरीले मुखियालाई नियन्त्रणमा लिई सोधपुछ गर्दा घरदेखि टाढा आलुबारीमा गंगामायाको हत्या गरी वर्कोले बेरेर गाडेको बताएपछि खटिएको प्रहरीले उक्त स्थानमा उत्खनन गर्दा गाडेको अवस्थामा शव फेला परेको थियो ।

प्रहरी निरीक्षक (इन्स्पेक्टर) विज्ञान बस्नेतले मुखियाको थप अनुसन्धान भइरहेको बताए । उनले भने, ‘अदालत म्याद थप गरेर कर्तव्य जान सम्बन्धि मुद्दा चलाउने तयारी गरेका छौँ ।’

पछिल्लो समय आफ्नै श्रीमानबाट हत्या हुने, कुटपिट गर्ने, मानसिक र शारीरिक हिंसा गर्ने क्रम बढ्दो रहेको प्रहरीले जनाएको छ ।
महानगरीय प्रहरी परिसर काठमाडौं महिला तथा बालबालिका सेवा केन्द्र कालिमाटीको तथ्यांकले समेत महिलाहरु श्रीमानबाटै हिंसामा पर्ने क्रम बढेको देखाउँछ ।

कार्यालयको तथ्यांक अनुसार पीडित र पीडकको नाता सम्बन्ध हेर्दा आव ०७३÷७४ मा श्रीमान, श्रीमतिबीचका १ हजार ७ सय ७१ उजुरी परेको छ । जसमा परिसर अन्तर्गतको महिला तथा बालबालिका सेवा केन्द्रमा ८ सय ४१ र मातहतका महिला सेलमा ९ सय ३० वटा उजुरी परेको थियो ।

यस्तै बुहारी, सासु सुसुराबीचको उजुरीमा ४७, जेठाजु, जेठानीकाबीच १०, नन्द, भाउज ५, छोरी र आमा ५ र सौतेनी आमा १ गरी १ हजार ८ सय ३९ वटा घटना दर्ता भएका थिए ।

यस्तै आव ०७२÷०७३ मा श्रीमान, श्रीमतीका १ हजार ४ सय २९ वटा उजुरी परेका थिए । जसमा परिसर महिला सेलमा ७ सय २ र मातहतमा ७ सय २७ वटा उजुरी परेका थिए ।

बुहारी– सासु ससुरामा २८, जेठाजु, जेडानीमा ८, छोरी, आमाका ८, सौताने आमा ५, नन्द, भाउजु ४ वटा उजुरी परेका थिए ।
महिला सेलकी प्रहरी सहायक निरीक्षक निर्मला ओझा भन्छिन्, ‘पछिल्लो समय महिलाहरु आफ्नै श्रीमानबाट हिंसामा पर्ने क्रम बढ्दो छ । महिला सेलमा आएका अधिकांश घटना श्रीमान, श्रीमतीबीचकै हुने गरेका छन् ।’

    Comment Here!

Related NEWS
मुख्य खबर

हिंसा र पारिवारिक खटनको शोक छ! गरीबी र चेतनाविहिनताको रोग छ!

-ललिता साह- राजविराज नगर पालिका वडा न. ८ की निकिता यादव १७ महिना को अन्तरालमा दुईवटा

सञ्चारिका समूहको साधारणसभा सम्पन्न

-महिला खबर- सञ्चारिका समूहको २४ औं वार्षिक साधारणसभा आज काठमाडौंमा भर्चुअल रुपमा सम्पन्न भएको छ ।

ससंकटमा छोरी सन्तान

-बिशाल सुनार- दैलेख । लिङ्ग पहिचानसहितको गर्भाधान होस् वा गर्भपतन कानुनतः अपराध हो । तर पनि

सुगा

-कविता राई- आँखामा सक्कली निरीहता ओढेर बाँचिरहेछु सृष्टिभ्रम असती समयको जाँतोले किचिएर पिलिएको छातिबाट ओकलिरहेछु अप्राकृतिक लय !

‘लैङ्गिक उत्तरदायी तथा समावेशी जैविक विविधता संरक्षण’ सम्बन्धि भर्चुअल सम्मेलन सम्पन्न

-महिला खबर- “लैङ्गिक उत्तरदायी तथा समावेशी जैविक विविधता संरक्षण” सम्बन्धि भर्चुअल सम्मेलन देशभरको पच्चीस जिल्लाबाट करिब

Read more
ताजा अपडेट
© 2015.All rights reserved by mahilakhabar.com
%d bloggers like this: