अपांगता भएकी महिला दाजुबाटै बलात्कृत, लोग्नेबाट घर निकाला


रक्षक नै भक्षक, कहाँ छ न्याय ?

प्रकाशित मिति :2018-03-15 15:57:44

–महिला खबर–

ललितपुर । बझाङको खप्तड छान्ना गाउँपालिकाकी सुनिता (नाम परिवर्तन) जन्मजात अपांगता हुन् । अर्थात उनको कम्मर भन्दा तलको भाग चल्दैन । २१ वर्षीया उनी हात टेकेर हिँडडुल गर्छिन् । कसैले दिए खान्छिन्, नत्र भने भोकभोकै ।

अपांगता भएकै कारण लेखपढ गर्ने अधिकारबाट बञ्चित भइन् उनी । गरिव अनि अशिक्षित परिवारमा अपांगता भएर जन्मिनु नै उनका लागि अभिसाप बनिदियो । जसका कारण उनले लेख्ने पढ्ने अवसर पनि गुमाइन् । जीवन सहज ढंगले जीउन पाउने अधिकारमा समेत बारम्बार प्रहार भइरह्यो– परिवार, आफन्त र नातेदारबाटै । सुनितामाथि जन्मिदै सुरु भएको विभेदको श्रृंखला जीवनका दुई दशक पार गर्दा समेत जारी छ । र अन्त्य कहिले हो कुनै टुंगो छैन ।

दाईबाटै बलात्कार

सुनितालाई आफ्नो उमेर ठ्याक्कै यति नै हो भन्ने थाहा छैन । किनकी उनकी आमालाई नै छोरीको उमेर थाहा छैन । त्यस्तै १७–१८ वर्षको उमेरमा सुनिता नाताले दाई पर्ने रुपक रोकायाबाट बलात्कृत भइन् । कसैलाई भने मारिदिने धम्की दिएका कारण उनले घटना सार्वजनिक गरिनन् । हाड नाताभित्र भएको बलात्कारको कुरा कसैलाई थाहा भएन ।

आफूमाथि अन्याय भएको कुरा उनले न त बुझिन्, न कसैलाई भन्ने आँट नै गरिन् । पेट बढ्दै गएपछि एक कान दुई कान मैदान भो । घटना बाहिर आयो । सुनिताकी आमाले छोरीलाई रुपकको घरमा बुझाइदिइन् । छिमेकी सबैलाई भेला गराइयो । सुनिता र सुनिताबाट जन्मिएको शिशुको जीवनभर पालन पोषण रुपक र रुपकको परिवारले गर्ने सहमतिमा २०७१ साल जेठ १९ गते तमसुक बनाइयो । नेपाली कागजमा लेखिएको यो तमसुक अधिवक्ता कुबेरसिंहले बनाइदिएका छन् । घटना सामसुम भो । त्यसको केही समयमा सुनिताले जिल्ला अस्पताल बझाङमा छोरा जन्माइन् ।

सुत्केरीमै जवरजस्ती विवाह

सुनिताबाट छोरा जन्मिएको कुरा आफन्त, नातागोता सबैले थाहा पाए । सुनिता अस्पतालमै थिइन् । बझाङको देउलेखका एक विवाहित पुरुष सुनितालाई श्रीमती र उनको छोरालाई छोरा स्वीकार्न अस्पतालमै पुगे । घरकी श्रीमतीबाट छोरी मात्रै जन्मिएपछि बिरक्तिएका उनले छोराका लागि सुनितालाई श्रीमती बनाएर सुत्केरी अवस्थामै घर भित्र्याए ।

आफूलाई श्रीमती बनाएर लिएका लोग्ने मान्छे को हुन्, कस्ता मान्छे हुन् सुनितालाई अहिले पनि केही जानकारी छैन । सुनितामाथि भएको हाडनाता करणीको घटनाले गाउँकै बेइज्जत भयो भन्दै आफ्नै आमा र आफन्तले नवजात शिशुसहित अपरिचित पुरुषको जिम्मा लगाए । उनी उम्कने कहीँ कतै ठाउँ थिएन । प्रतिकार त उनका लागि टाठाको विषय । त्यसैमाथि श्रीमती बनाएर लिएका पुरुषले पनि एक महिना नबित्दै घर निकाला गरे । छोरा भने आफैसँग राखे । तिमी माइती जाऔ भन्दै बसमा राखिदिए ।

लोग्ने भनिएको मान्छेले यो बस तिम्रो माइती घरमै जान्छ । केही दिन माइती बस, म लिन आउछु भन्दै बसमा चढाइदिए । माइती कता हो, के हो समेत उनलाई जानकारी थिएन । उनी चढेको बस त अर्को दिन कञ्चनपुरको महेन्द्रनगर पुगेछ । महेन्द्रनगर बसपार्कमा पुगेपछि बस रोकियो । सबै यात्रु आ–आफ्नो बाटो लागे । उनी अलपत्र परिन् । सुनितालाई अलपत्र अवस्थामै बसपार्कमा एक जना आफन्तले भेटे । तिमी यहाँ कसरी आयौ ? भन्दा लोग्नेले माइती पठाएको जवाफ दिएपछि आफन्तले उनीमाथि धोका भएको थाहा पाए । अनि फेरि आफैले टिकट काटिदिएर सुनितालाई बझाङ् फिर्ता पठाइदिए ।

सुनिता यतिबेला बझाङ्मा आमासँग छिन् । आफन्त, नातागोताबिच हेलाको पात्र भएर कष्टकर जीवन बाँचिरहेकी छन् । सुनिताले गहभरी आँसु पार्दै भनिन्, ‘आमाले समेत तेरा दुई–दुई लोग्ने छन् । उनीहरूकै घरमा जा । म पाल्न सक्दिन भन्छिन् । म कहाँ जाऔं ?’

सुनिताले अहिलेसम्म पनि छोराको मुख देख्न पाएकी छैनन् । तर उनलाई छोरा आफैसँग राख्ने इच्छा ठूलो छ ।

अपांगता परिचय पत्र छ, भत्ता छैन

२०६८ सालमा सुनिताले ‘ख’ वर्गको परिचय पत्र पाइन् । अति अशक्त अपांगता अन्तरगत सामाजिक सुरक्षा भत्ता पाउदै आएकी थिइन् । छोरा जन्मेर अस्पतालबाटै सुनिताको बिहे भइसक्यो भन्ने थाहा पाएपछि तत्कालिन गाविस सचिव नरेश बाबु स्नेहीले सामाजिक सुरक्षा भत्ता पाउने नामबाट सुनिताको नाम काटिएदिए । अहिले उनी त्यही भत्ता समेत पाउदिनन् । उनीसँग अपांगता परिचय पत्र छ, भत्ता भने पाउँदिनन् ।

गाविस सचिव नरेश बाबु स्नेहीले महिला खबरसँग भने, ‘उहाँको अर्को गाउँमा बिहे भयो भन्ने थाहा पाएपछि सामाजिक सुरक्षा भत्ता पाउने नामबाट नाम काटिएको हो । मेरो नियत गलत होइन ।’

सहयोगको खाँचो

सुनिताका बुबा उनी सानै छँदा आमालाई छोडेर अर्की श्रीमतीसँग अर्कै गाउँमा बस्छन् । आमालाई पनि पेट गुजारा गर्न मुस्किल छ । त्यसैमाथि अपांगता भएकी छोरी र उनीमाथि भएको अपराधले आमा पनि सकेसम्म छोरीलाई सँगै राख्न चाहदिनन् । किनभने टोल छिमेकमा हाडनाताभित्रै भएको करणी र उनीबाट जन्मेको छोराको बारेमा नकारात्मक टीका टिप्पणी भइरहन्छ । नराम्रो छोरीको उदाहरण दिनुपर्दा सुनिता नै उदाहरणको पात्र बन्छिन् । जुन कुरा आमा सुन्नै चाहन्नन् ।

सुनिताको पृष्ठभूमि, उनीमाथि भएका श्रृंखलावद्ध हिंसाका घटना हेर्दा सुनिता जोखिममा छिन् । उनीमाथि कतिबेला के हुन्छ भन्ने कुरामा आमा पनि चिन्तित छन् । सुनिता पनि सहयोगको पर्खाइमा छन् ।

    Comment Here!

Related NEWS
मुख्य खबर

पत्रकार मृत फेला

-महिला खबर- पत्रकार निर्मला पहराई शुक्रबार मृत फेला परेकी छिन् ।

बैठकमा महिला सहभागिता नभएकोमा चिन्ता

-महिला खबर- गैर आवासीय नेपाली संघले अमेरिका क्षेत्रको क्षेत्रीय बैठकमा महिलाको सहभागिता हुन नसकेको विषयप्रति ध्यानाकर्षण

खाद्यान्न सहयोग

अछामको मंगलसेन नगरपालिकाका दुई वडामा ६० जना विपन्न एकल महिलालाई अछाम जेसिजले खाद्यान्न सहयोग गरेको

सुरक्षित मातृत्व तथा प्रजनन् स्वास्थ्य अधिकार नियमावली स्वीकृत

काठमाडौँ । सुरक्षित मातृत्व तथा प्रजनन् स्वास्थ्य अधिकार ऐन, २०७५ लागु भएको तीन वर्षपछि नियमावली

उद्यमी महिलालाई अनलाइन बजारीकरण र ऋणमा समस्या

-महिला खबर- कोभिड-१९ को असरका कारण ऋण चुक्ता गर्न नसकेको र कर्मचारीलाई तलव दिन समस्या भएको

Read more
ताजा अपडेट
© 2015.All rights reserved by mahilakhabar.com
%d bloggers like this: