सम्मेलन गराउनु छ–आमा,छोरी र देवताहरुको


सन्दर्भः अन्तर्राष्ट्रिय महिनावारी दिवस

प्रकाशित मिति :2018-06-01 14:13:02

–रावल कृष्ण–

मेरी आमाले भन्नु भएको
विहे गरेको केहि महिनापछि
लेकमा दाउरा लिन जाँदा
लगाएको गुन्युमा रातो दाग देखिएपछि
संगीहरुले भने तिमी छाउ भयौ

दाउराको भारी आँगनमा फुत्त फालेर
त्यो साँझको बेला
आमा निस्कुन भो घरको आँगनबाटै
बस्नु भो जीवनका पहिलो वास
घरभन्दा पर एउटा झुप्रोमा
नाम थियो छाउपडी गोठ

रावल कृष्ण

आमा घर देखाउँदै भन्नुहुन्छ
यो घर बनाउँदा म सुत्केरी थिएँ
जेठो छोरा र यो घरको उमेर बराबर छ
घरका ढुङ्गा बोक्दा मेरी आमाले लगाएको गुन्युमा रातो दाग देखियो
र आमाले सम्झनु भो फेरी छाउ भइयो

घरदेखि पर जानु नपरोस् भनेर होला
मेरी आमाले घर बनाउँदा
घरको भुइतलामा एउटा सानो कोठा बनाउनु भो
र नाम राखियो छाउपडी गोठ
हो त्यहि गोठमा आमाले जन्माइन आफ्ना छ सन्तान

म त्यहि गोठमा जन्मेको मान्छे
र तीन वर्षसम्म हरेक महिना चार रात त्यहि गोठमा सुतेको छु
गोठबाट घर लैजादा हरेक विहान नाङ्गै पारेर नुहाइएको छु म
अलि ठूलो भएपछि
हरेक महिना घरको ओटालोबाट
आमालाई नछोइकन खाना र पानी दिएको छु

आमा सुनाउनु हुन्थ्यो
महिलाले कति भोग्नु पीडा
प्रत्येक महिना
एउटा सन्तान जन्माउन सक्ने डिम्ब खेर जाँदा पनि
भन्न मिल्दैन ऐया
हुने भए कुनै औषधि
खुवाइदिन्थे मेरा छोरीहरुलाई
र जोगाउँथे हरेक महिनाको मृत्युबाट
बनाइदिन्थे कहिल्यै छाउ नहुने चलन
र मनको आदेशमा अण्ड निस्कासन गर्नसक्ने क्षमता

आमा भन्नु हुन्छ
कुन देवताको श्राप कटाउन महिलाले छाउ हुनु परेको रे
अहिले आमा छाउ हुनुहुन्न
मैले मेरा दिदीहरु र भाउजूहरुलाई सोधेको छु
मैले मेरा वैनीहरु र छोरीहरुलाई सोधेको छु
के हुन्छ छाउ भएको बेला सधै सुत्ने कोठामा सुत्दा
मैले केहि धामीहरु र पुजारीहरुलाई सोधेको छु
के हुन्छ छाउ भएको बेला सधै खाने भान्छामा खादा
उनीहरु सबैको उत्तर छ
छाउ भएको बेला घरमा बस्दा देवता रिसाउँछन्
भन्छन् छाउ भएको बेला
छुनु हुदैन फल्ने डाली
छुनु हुदैन गाइ र भैसी
खानु हुदैन गोरस

प्रश्नहरुहरुको प्रशोधन गृहबाटै
मलाई फेरी एउटा प्रश्नले सधै विथोलिरहेछ
मेरी बैनीहरु र मेरी छोरीहरुले
अमुक देवताको श्राप कटाउन
हरेक महिना हामी छाउ हुदैनौ भनेको दिन
के हालत होला ती देवताको अवस्था ?

छाउ भएका आमाहरु र छोरीहरुसंग
देवता रिसाउने भए
मलाई आमाहरु, छोरीहरु र देवताहरुको
एउटा सम्मेलन गराउन मन छ
र छिनोफानो गर्नु छ
देवता र मान्छेहरुको वासस्थानको

मान्छेलाई देवता र देवतालाई मान्छे
आवश्यक हो भने
अब एउटा फैसला नगरी भएको छैन
देवताले मान्छेको वासस्थानमा गरेका अतिक्रमण नरोकी भएको छैन
घर मान्छेको हो
मान्छेको मनमा बसुन देवता
मान्छेको घरमा नवसुन देवता
देवता वस्ने ठाउँ त मन्दिर हो
मन्दिरबाट उठाएर देवतालाई बाहरुले ल्याएका हुन घरमा
र राखेका हुन माथिल्लो तलामा
अब देवताहरुलाई फर्काइनु पर्छ
आफ्नै वासस्थानमा
हाम्री आमा र छोरीहरुलाई
छाउपडी गोठबाट
फर्काइनु पर्छ घरमा
र खुवाउनु पर्छ विगौती दुध

रमारोशन, २, चाफामाण्डौ अछाम

    Comment Here!

Related NEWS
मुख्य खबर

सञ्चारिका अध्यक्ष सहित तीन पत्रकार महिलालाई राष्ट्रिय पुरस्कार

-महिला खबर- नेपाल सरकार सूचना तथा सञ्चार प्रविधि मन्त्रालयले प्रदान गर्दै आएको ‘राष्ट्रिय पत्रकारिता पुरस्कार’ सञ्चारिका

संसदीय मामिलाको नेतृत्वमा महिलाको संभावना/अध्यक्षमा कृष्णा पौडेलको उम्मेदवारी

-महिला खबर- संसदीय गतिविधिको समाचार संकलन गर्ने पत्रकारहरुको संस्था संसदीय मामिला पत्रकार समाजको नेतृत्वमा पहिलो पटक

पत्रकार रुपा शर्मा नेहालाई राष्ट्रिय मिडिया एक्सिलेन्स कन्ट्रिव्युसन अवार्ड

-महिला खबर- संचारको माध्यमबाट समाजिक रुपान्तरणमा शसक्त भुमिका निर्वाह गर्नुका साथै समाजिक अभियानमा क्रियाशिल भएको भन्दै

हिंसा र पारिवारिक खटनको शोक छ! गरीबी र चेतनाविहिनताको रोग छ!

-ललिता साह- राजविराज नगर पालिका वडा न. ८ की निकिता यादव १७ महिना को अन्तरालमा दुईवटा

सञ्चारिका समूहको साधारणसभा सम्पन्न

-महिला खबर- सञ्चारिका समूहको २४ औं वार्षिक साधारणसभा आज काठमाडौंमा भर्चुअल रुपमा सम्पन्न भएको छ ।

Read more
ताजा अपडेट
© 2015.All rights reserved by mahilakhabar.com
%d bloggers like this: